You are viewing [info]chechtlhutlh's journal

chechtlhutlh
17 May 2011 @ 05:40 am
tlhIngan Hamlet vIlaD  
cha'Hu' qoSDaj lop jupwI' 'ej mumuvmoHta'. bom bomnIS Hoch jeSwI', pagh jan reHnIS pagh pIlmoHbogh ghItlh laDnIS. ta'meyvam vIta' 'e' vInIDtaHvIS jIpo'be', vaj vay' pIm vIta' 'e' vIwuq. tlhIngan Hamlet bI'reS vIlaDta'. 'op nuvpu'vaD tlhaQ, 'ej latlh nuvpu' vIyay'moHbej.

 
4 vuDmey | vuDlIj yISovmoH
 
chechtlhutlh
15 May 2011 @ 09:26 am
Sawchuqlu' 'ej naychuqlu' 'e' lughov Hoch Brazil bo'DIj'a' 'oDwI'pu'  
Sawchuqlu' 'ej naychuqlu' net ghovchoH. jarvam, jaj vagh 'e' wuq Brazil DIvI' bo'DIj'a'. wa'nI' potlhqu' 'ej qawlu'bej. luwuq SaHbogh Hoch wa'maH 'oDwI'pu'. jaS wuq pagh.

DaH Sawpu'wI'pu' motlh DIbmey, naypu'wI'pu' motlh DIbmey je rurbogh DIbmey'e' ghajnIS Sawchuqpu'wI'pu', naychuqpu'wI'pu' je. vaj roD ropyaH patvaD DIlchugh vay', loDnalDaj, be'nalDaj ghap QorghnIS patvam. Heghchugh Huch Hevbogh vumbe'choHpu'wI''e', Huchvam luHevtaH loDnalDaj chuv, be'nalDaj chuv ghap. 'ej Dorchugh tlhogh, roD DIlnIS je loDnalDaj mIp, be'nalDaj mIp ghap. puq QorghchoHqangchugh, ngeDchoHlaw' je mIw.

cha' ngoDmey lupoQlu'pu'bogh poj bo'DIj'a'. 'op yaH DIbmey ghaj qum yaSpu' loDnalpu', be'nal'pu' je net poQ 'ej qorDu' chaH net chIDchoH net poQ je. 'oH wuqpu'mo' bo'DIj'a', lulobnIS Hoch bo'DIjmey QIv.
 
4 vuDmey | vuDlIj yISovmoH
 
chechtlhutlh
01 May 2011 @ 11:52 pm
qoSwIj vIlop  
wejmaH ben jIbogh. wa'leS 'oH qoSna'wIj'e' 'ach wa'Hu' vIlop. mumuv wa'maH juppu'. Mexican Soj vIvut. cha' HIq Seghmey vIjab. puj wa' Segh 'ej tlhutlhmeH ngeD. HoS latlh HIq 'ej tlhutlhmeH, motlh tlhIl na', na'ran wIb je jablu'. SopmeH, gho chabmey vIjab 'ej lughoDlu'meH, 'uSgheb qettlhup tlhorgh, tangqa' tlhIq tlhorgh, qurgh tlhorgh vItappu'bogh je lulo'lu'. mayonDI', qoS bom wIbom 'ej chab weQ vImeQbe'moHmeH vISuS. ghIq mamI'meH 'ej latlh HIq wItlhutlhmeH, ram tach wIjaH. qoSwIj vItIvqu'.
 
wa' vuD | vuDlIj yISovmoH
 
chechtlhutlh
05 October 2010 @ 10:04 am
jIqIDbe'! woQ wIv'a' SIQ 'ej Qap laDlaHbe'bogh HaghmoHwI'  
Tiririca
{{nuq ta' rIp 'oSwI'? vISovbe' 'e' 'oH vIt'e', 'ach chowIvchugh qaja'laH}}


Dat, woQ wIvnISlu'DI', HaghmoHwI'pu' neH lutu'lu'mo' bep wIvwI'pu'. 'ach cha'Hu' qechvam lupabchu'ta' Brazil nganpu'. rIp vaS'a'Daq HaghmoHwI'na' lungeHta'. naDmeyDaj law' law', Hoch gheSqangwI'pu' naDmey law' puS.

Tiririca 'oH HaghmoHwI' pong'e'. wa''uy' wejbIp naDmey Hevpu'. gheSqangwI' cha'DIch qeSlu'chugh, cha'logh nIv naDmeyDaj mI'.

tulbe'wI'pu' ponmeH, mu'tlhegh tlhaQ jatlh, {{'arghlaHbe' ghu'}}. wa' ta' neH lay'. 'oSwI'pu' ta'mey qImqang 'ej wIvmoHwI'pu' SovmoHqang.

{{nuq ta' rIp 'oSwI'? vISovbe' 'e' 'oH vIt'e', 'ach chowIvchugh qaja'laH}}, jatlh loSmaH vagh ben boghbogh gheSqangwI'.

{{berghwI'}} 'oS Tiririca pong. ghom'a'meyvaD SaHDI', motlh mIv Doq, Sut wov, ngebbogh jIb SuD je tuQ. laDlaHbe' Hu' puS 'e' lutobmo' woQ pumwI'pu', gheSlaH 'e' lubot 'e' lunID, 'ach tagha' nargh Tiririca.

num'eghmeH, Huch law' Hev Tiririca. gheS latlh 'oSwI'pu' 'e' luQaH Tiririca naDmey. 'op naDmeyDaj 'Iq Hev boqDaj gheSqangwI'pu' 'e' luchaw' Brazil wIv'a' chutmey. DaHjaj che'taHbogh tlhach ngaS boqDaj.

http://www.msnbc.msn.com/id/39495001/ns/world_news-americas/
 
 
vuDlIj yISovmoH
 
chechtlhutlh
19 August 2007 @ 11:19 pm
tlhIngan Hol leQ jan  
 


tlhIngan Hol leQ jan 'oghta' Cherry 'ej DaH tlhIngan Hol, tlhIngan ghItlh je lo'laH lo'wI'pu'. Windows, OS-X (Mac), Linux ghap lulu'chugh, Qap leQ jan.

<vummeH, DaH tlhIngan Hol lulo'laH De'wI' lo'wIpu'. Qumchu' leQ janvam, tlhIngan Hol patmey je. vaj cholchuq Human tIgh, tlhIngan tIgh je.>, jatlh Stalker Zantai Subaiesh Qang. tlhIngan wo' gharwI'pu' (Klingon Imperial Diplomatic Corps) Qang ghaH.

tugh romuluS Hol leQ jan, vulqan Hol leQ jan je chenmoH je.
 
vuDlIj yISovmoH
 
chechtlhutlh
26 July 2007 @ 01:05 pm
Hegh leSSov ghaj vIghro'  
Oscar, a hospice cat at Steere House Nursing and Rehabilitation Center in Providence, R.I., sits outside a patient's room. (Stew Milne, Associated Press)

laH Huj ghajlaw' Oscar vIghro'. HeghbeH ropyaH SIDpu' 'e' SovDI', chaH retlhDaq Qot 'ej leS. cha'maH vaghlogh qar leSSovDaj. ropwI' wIvDI', SID qorDu' lumuvmoH ropyaH vumwI'pu'. roD Hegh qaSpu'DI' poH ngajqu'. pIjHa' Qagh.

motlh ghojmoqpu', Qelpu' je Da 'ej pa'mey Suchqa'taH. 'ach HeghbeH nuv 'e' tu'DI', nuv ghoS 'ej leS. Hegh leSSovDaj qar law', ropyaH vumwI'pu' leSSovmey qar puS.
Tags: ,
 
2 vuDmey | vuDlIj yISovmoH
 
chechtlhutlh
24 July 2007 @ 01:22 pm
ghew rur qoqHom  



qaStaHvIS Soch DIS, ghew qoqHom lu'ItlhmoH tejpu'. tagha' puvlaH. machqu' 'oH. wa' cheb ngI'lu'meH, 'ut 38 000 chovnatlhmey. 0,01 'uj 'aD telmey 'er'Inmey chuq. Hung jan 'oH. vengmey, che'ronmey je jIHmeH, lo'lu' net nab.

Qatlhqu' 'ay'HommeyDaj mach luchenmoHlu'meH Qu'. 'ay'Hommeyvam luSIjlu'meH, 'ut machqu'bogh 'uD jo' le'. tar Hapmey tu'laH je qoqHom 'e' luHar QulwI'pu'.
Tags: , ,
 
2 vuDmey | vuDlIj yISovmoH
 
chechtlhutlh
24 October 2006 @ 08:01 pm
jIDel'egh  
cha'maH vagh ben jIbogh. loD jIH.
reH Holmey vIparHa'taH 'ej 'op ben tlhIngan Hol vIHaDchoH.
qen De'wI' tej vImoj. jIghun 'e' vIparHa' je.
Duj Hung yaHvaD jIvum. qen Dujmey ghochmeH pat wIghunta' jIH, latlh nuvpu' je.
jIvut 'e' vItIv. chan Sop vIparHa'qu'.
 
wa' vuD | vuDlIj yISovmoH